Հաջորդ նիստում կլինի նոր փաստաբան

ԵԿՄ Արաբկիրի կառույցի ղեկավար, «Արաբկիր» ջոկատի հրամանատար Հովհաննես Հարությունյանի հարազատները ՀՀ Վերաքննիչ քրեական գործերով դատարան էին ներկայացել «Իմ ամուսինը քաղբանտարկյալ է», «Իմ եղբայրը քաղբանտարկյալ է» պաստառները կրծքներին ամրացված:

Ազատամարտիկը մեղադրվում է քրեական օրենսգրքի 235 հոդվածի հատկանիշներով` փետրվարի 26-ին նրա բնակարանից հայտնաբերվել է 7-62 մմ տրամաչափի 30 փամփուշտ: Այդ 30 փամփուշտի համար Երեւանի Արաբկիր եւ Քանաքեռ-Զեյթուն համայնքների ընդհանուր իրավասության դատարանը նրան դատապարտել է 1,5 տարվա ազատազրկման:

Երբ հրամանատարին դատական նիստերի դահլիճ բերեցին, ներկաները ոչ միայն նրան ծափերով դիմավորեցին, այլեւ` սկսեցին բարձր վանկարկել. «Ազատություն, ազատություն»:

Վանկարկումները շարունակվեցին անգամ դատավորների գալուց հետո եւ միայն նախագահող դատավոր Մարգարիտա Սիմոնյանի` մի քանի անգամ հորդորներից հետո նրանք լռեցին: Հովհաննես Հարությունյանին դատարանի դահլիճ էին բերել ձեռնաշղթաներով: «Նայեք եղբորս ոտքերի կանդալները: Ո՞ւմ ոտքերն եք կանդալում: Նա կարո՞ղ է փախնի, երկիր է պաշտպանել»,-չդիմացավ հրամանատարի քույրը:

Դատը հետաձգվեց սկսվելուց անմիջապես հետո. փաստաբան Վարդան Զուռնաչյանը, որը ներկայացրել էր վերաքննիչ բողոքը, անհայտ պատճառով չէր ներկայացել դատական նիստին: Բացի այդ Հովհաննես Հարությունյանը դատարանից պահանջեց իբրեւ փասաբան ներգրավել եւս մեկ փաստաբանի` Հովիկ Արսենյանին:

Դատարանը բավարարեց պահանջը, սակայն զգուշացրեց, որ հաջորդ նիստին Հովիկ Արսենյանը պատրաստ ներկայանա եւ չպահանջի լրացուցիչ ժամանակ գործի նյութերին ծանոթանալու համար:

Հաջորդ նիստը կլինի մայիսի 22-ին, ժամը 11:30-ին:

Ի դեպ, Հովհաննես Հարությունյանի կինը` Անժելա Ալավերդյանը, մի քանի օր առաջ գրավոր դիմել էր Վերաքննիչ քրեական գործերով դատարանի դատավոր Մարգարիտա Սիմոնյանին, որպեսզի այսօր տրամադրվեր մեծ դահլիճ:

Նա ոչ միայն պատասխան չէր ստացել, այլեւ դատն այսօր կրկին նույն փոքր դաճլիճում անցկացվեց:

Ինչո՞ւ չի բավարարվել պահանջը` հարցին Մարգարիտա Սիմոնյանը պատասխանեց, որ տեխնիկական պատճառներով իրենք միշտ այդ նույն դահլիճում են դատերը լսում, եւ խոստացավ նաեւ գրավոր պատասխանել նամակին:

Նշենք, որ նույն հիմնավորմամբ հետաձգվել էր նաեւ Մասիսի գումարտակի հրամանատար Հուսիկ Բաղդասարյանի գործով վերաքննիչ դատավարությունը, քանի որ նա եւ պահանջել էր երկրորդ փաստաբան: Ինչպես Հովհաննես Հարությունյանի, նրա շահերն էլ առ այսօր պաշտպանում էր փաստաբան Վարդան Զուռնաչյանը:

A1+