Սահմանադրական կարգի խախտմամբ պետական իշխանությունը յուրացնելու նպատակով Երեւան քաղաքում զանգվածային անկարգություններ հրահրելու եւ կազմակերպելու, իշխանության ներկայացուցչի նկատմամբ բռնություն գործադրելու դեպքի առթիվ ՀՀ հատուկ քննչական ծառայության վարույթում քննվող քրեական գործի շրջանակներում նախնական կալանքի տակ է 54 անձ: Կալանավորվածներին այցելելու Հելսինկյան ընկերակցության նախագահ Միքայել Դանիելյանի փորձերը անցել են ապարդյուն: Պարոն Դանիելյանը «Ա1+»-ին տեղեկացրեց, որ մարտի 1-ի դեպքերից հետո կալանավայրեր այցելել կարողանում է միայն Արդարադատության նախարարության Քրեակատարողական ծառայությունում հասարակական վերահսկողություն իրականացնող դիտորդների խումբը, որին չի անդամակցում ինքը:
«Մարտի 4-ից մենք պարբերաբար այցելում ենք կալանավորվածներին եւ մոտ 15 այցելություն ենք կատարել: Կալանքի տակ գտնվողները հիմնականում չեն դժգոհում իրենց նկատմամբ վերաբերմունքից, նրանց դժգոհությունը կապված է նախաքննության մարմնի հետ, որը միջնորդում է երկարաձգել նրանց կալանքի ժամկետը»,- «Ա1+»-ին հայտնեց Արդարադատության նախարարության Քրեակատարողական ծառայությունում հասարակական վերահսկողություն իրականացնող դիտորդների խմբի ղեկավար Միքայել Բաղդասարյանը: Նա նաեւ նշեց, որ մարտի 4-ից հետո կալանավայեր կատարած այցելությունների ընթացքում ընդամենը 3 կալանավորվածի են հանդիպել` բռնության հետքերով:
«Բռնության հետքեր տեսել ենք Մուշեղ Սաղաթելյանի եւ Դավիթ Մաթեւոսյանի վրա»: Իսկ բռնության հետքերը կոպիտ եւ ակնառո՞ւ էին` «Ա1+»-ի հարցին` պարոն Բաղդասարյանը պատասխանեց. «Իհարկե, Մուշեղ Սաղաթելյանի ամբողջ մարմնի վրա, հատկապես քունքերի հատվածում էր վնասվածքները, իսկ Դավիթ Մաթեւոսյանի` գլխի հատվածում»: Իսկ 3-րդ անձին Միքայել Բաղդասարյանը չհիշեց: Պարոն Բաղդասարյանը նաեւ նշեց, որ իրենք չեն լուսանկարել բռնության ենթարկվածներին, քանի որ գտնում են, որ դա մարդու իրավունքների խախտում է:
Նա մեզ հետ զրույցում տեղեկացրեց, որ այցելել են հանրությանը հայտնի բոլոր դեմքերին եւ բոլորն էլ նրանց հայտնել են, որ բռնություն իրենց նկատմամբ կիրառվել է միայն ձերբակալման պահին եւ Ոստիկանության բաժանմունքներում: Կալանավորվածներից ոմանք նաեւ դժգոհել են, որ իրենք հնարավորություն չեն ունեցել օգտվել փաստաբանի ծառայությունից: Կալանավորվածներին վերջին անագամ մոնիտորինգի խումբը այցելել է 5 օր առաջ.
Հասարակական վերահսկողություն իրականացնող դիտորդների խումբը գործում է 2004 թ-ից եւ տարեկան հաշվետվություն է ներկայացնում իրենց աշխատանքների մասին: Խմբում ընդգրկված են իրավապաշտպան գործունեություն իրականացնող կազմակերպությունների անդամներ: «Մարտի 1-ի դեպքերից կապակցությամբ ամռանը մենք կներկայացնենք միջանկյալ հաշվետվություն»,- «Ա1+»-ին տեղեկացրեց Միքայել Բաղդասարյանը:
A1+
No comments:
Post a Comment