Արամ Սարգսյանն առաջնորդվում է այլ օրենքներով

«Հունիսի 20-ին տեղի կունենա Լեւոն Տեր-Պետրոսյանի հանրահավաքը, քանի որ հասարակությունը Տեր-Պետրոսյանին եւ ընդդիմության մյուս առաջնորդներին լսելու կարիք ունի»,- այսօր «Ա1+»-ին վստահեցրեց «Հանրապետություն» կուսակցության նախագահ Արամ Սարգսյանը: Նա նշեց, որ հասարակությունն այսօր էլ շփվում է Տեր-Պետրոսյանի հետ. տեսաերիզների միջոցով առաջին նախագահի խոսքը հասնում է ժողովրդին, սակայն նաեւ կենդանի շփման կարիք կա. «Ցանկացած օր, երբ Տեր-Պետրոսյանը հարթակ գա, մարդիկ նորից հավաքվելու են, եւ դա արդարացված է»: Արամ Սարգսյանի կարծիքով հասարակություն այսօր միայն ցանկանում է լսել, թե ինչպես է արձանագրվելու իր հաղթանակը: Պարոն Սարգսյանը տեղեկացրեց, որ հունիսի 20-ի հանրահավաքի մասին ընդդիմությունը Երեւանի քաղաքապետարանին դեռ չի իրազեկել, սակայն կհասցնի: «Ես քաղաքապետարանին խորհուրդ կտայի, որ չմերժեն, քանի որ միեւնույնն է` մարդիկ կգան»: Չե՞ք կարծում, որ նախապես հայտարարելով, թե երբ է նախատեսված հանրահավաքը` իշխանություններին հուշում եք, որ հենց այդ օրը մայրաքաղաքի բոլոր հրապարակները զբաղեցնեն` «Ա1+»-ի հարցին` պարոն Սարգսյանը պատասխանեց. «Այդ մանր ճարպկությունները քաղաքապետարանն անում է պարտադրված: Անկախ նրանից հանրահավաքի օրը նշվեր, թե ոչ, եթե իրենք որոշեն մերժել, կմերժեն առանց պատճառի: Այս երկորւմ այսօր ավելի կարեւոր բան չկա, քանի հասարակության պահանջը` լսել իր առաջնորդին»:

Արամ Սարգսյանը վստահ է, որ ուշ, թե շուտ երկրում հանրահավաքներ լինելու են եւ դրանք խոչընդոտելու իշխանությունների փորձերը անիմաստ են: Պարոն Սարգսյանը լուրջ չի ընդունում «ժողովների, հավաքների, երթերի եւ ցույցերի մասին» օրենքում տեղ գտած սահմանափակումները, առավել եւս, որ ՀՀ սահմանդրությունը ՀՀ քաղաքացիներին շնորհել է ազատ հավաքների իրավունքը: Իսկ ինքն անձամբ առաջնորդվում է այլ օրենքով. «Ես առաջնորդվում եմ 2000-ամյա քրիստոնական օրենքով`«Ձայն բազմաց, ձայն Աստծո»: Սա ամենամեծ եւ գլխավոր օրենքն է, որից էլ պետությունները Սահմանադրություն եւ օրենքներ են ստեղծել եւ ասել, որ ժողովուրդները իրավունք ունեն հանրահավաքներ անցկացնելու»:

Ինչ վերաբերում է այսօր Ազատության հրապարակը ոստիկաններով շրջափակված լինելուն, ապա նա ասաց. «Եթե այդքան վախենում են ժողովրդից, ապա ինչպե՞ս են պատրաստվում ղեկավարել այս ժողովրդին»:

Ի դեպ, Արամ Սարգսյանն այսօր անդրադարձավ նաեւ Ռոբերտ Քոչարյանի սպորտային տեսքին, որով նա ներկայացել էր Սարդարապատի հուշահամալիր եւ ասաց. «Ես երբեք հիացած չեմ եղել Քոչարյանի մտավոր ունակություններով»:

A1+