«Նոր ժամանակներ» կուսակցության նախագահ Արամ Կարապետյանը «էրեբունի» բժշկական կենտրոնից իր 6 կուսակիցներին այսօր ուղերձ է հղել անհապաղ դուրս գալ հացադուլից, քանի որ. «Ձեր ուժերը դեռ պետք են թե ինձ, թե հասարակությանը, թե Հայաստանին: Համոզված եմ, որդուք կգտնեք պայքարի ձեւեր, որոնք չեն վնասի ձեր առողջական վիճակին»: Արդեն 6-րդ օրն է ՆԺԿ վարչության անդամ Հրաչյա Սարգսյանի գլխավորությամբ նրանք հացադուլ են անում Գլխավոր դատախազության շենքի մոտ` պահանջելով ազատ արձակել Արամ Կարապետյանին: Հիշեցնենք, որ Կենտրոն եւ Նորք-Մարաշ համայնքների ընդհանուր իրավասության դատարանը մայիսի 19-ին եւս երկու ամսով երկարաձգել է Արամ Կարապետյանի կալանքը:
Արամ Կարապետյանը նաեւ կասկածից վեր է համարել այն, որ հացադուլավորները Հրաչյա Սարգսյանի գլխավորությամբ պատրաստ են մինչեւ վերջ շարունակելու հացադուլը՝ մինչեւ իրենց պահանջների իրագործումը: Արամ Կարապետյանը նաեւ իր խորին շնորհակալությունն է հայտնում նրանց «այս դժվարին պահին իր կողքին գտնվելու եւ անձնազոհ քայլի դիմելու պատրաստակամության համար»:
Հացադուլավորներից Հրաչյա Սարգսյանը «Ա1+»-ին հայտնեց, որ այս պահին իրենք՝ 6 հացադուլավորներով քննարկում են իրենց առաջնորդի հորդորը: «Բնականաբար մենք պետք է հարգենք նրա ուղերձ-հորդորը: Եւ, ըստ երեւույթին, երեւի արդեն վաղվանից դուրս կգանք հացադուլից»,- ասաց Հրաչյա Սարգսյանը:
A1+
No comments:
Post a Comment