«Հայացք» ակումբում ասուլիսի ընթացքում մեծ ոգեւորությամբ վերհիշելով Շուշիի ազատագրման գործընթացը` գեներալ-գնդապետ Գուրգեն Դալիբալթայանը նշեց, որ հերոսական այդ մարտում ոչ ոք չէր մտածում զոհվելու կամ ողջ մնալու մասին, թեեւ ցավալիորեն 35 զոհ ունեցանք: Ասուլիսից հետո փորձեցինք ճշտել գեներալ-գնդապետի վերաբերմունքը ոչ պատերազմական պայմաններում գտնվող Հայաստանում 2008թ.-ի մարտի 1-ին տեղի ունեցած իրադարձությունների առնչությամբ, որոնց արդյունքում բազում զոհեր եղան: «Այդ օրը տեղի ունեցածը ես միանշանակ ողբերգություն եմ համարում, թե ով էր դրանում մեղավոր` ժամանակի ընթացքում կպարզվի: Ոչ մի հայ իրավունք չունի զենք ուղղել մեկ այլ հայի դեմ, այդպիսի հայը հայ կոչվելու իրավունք չունի, նա հանցագործ է: Եթե խնդիր էր դրվել ցրել հանրահավաքը, ապա դրա համար բազում այլ միջոցներ կային` ջրանետ մեքենաներ, արցունքաբեր գազ, ռետինե մահակներ..., բայց ոչ ավտոմատ: Ես կրկնում եմ, չգիտեմ, թե ովքե՞ր էին մեղավոր` ցուցարարնե՞րը, թե՞ կառավարությունը, բայց բոլոր դեպքերում ես նման երեւույթների թշնամին եմ: ԱՊՀ ոչ մի երկրում այդպիսի ողբերգություն տեղի չի ունեցել, ցավալի է, որ մեզ մոտ տեղի ունեցավ: Կարելի էր թեկուզ եւ ուժ կիրառելով ցրել հանրահավաքը, ինչպես որ հարեւան Վրաստանում տեղի ունեցավ, եւ ոչ մի զոհ չարձանագրվեց: Իսկ մեզ մոտ ավտոմատ գործի դրվեց: Ես` որպես իմ հայրենիքի առաջին զինվոր, շատ ցավագին եմ վերաբերվում այդ իրադարձություններին: Ժամանակն ամեն ինչ իր տեղը կդնի, սակայն ոչինչ չի մոռացվի, այդպիսի դեպքերը չեն մոռացվում», - ասաց պարոն գեներալը:zhamanak.com
No comments:
Post a Comment